+- الدعم العربي (https://www.mybbarab.com)
+-- قسم : :: . + التسلية والترفيه والمواضيع العامة والجادة + . :: (https://www.mybbarab.com/forum-23.html)
+--- قسم : المنتدى العام للمواضيع العامة (https://www.mybbarab.com/forum-41.html)
+---- قسم : منتدى النقاش العام (https://www.mybbarab.com/forum-62.html)
+---- الموضوع : من انا ؟ و من اكون ؟ هل انا صحيح ام كنت مخطئ ؟ (/thread-2575.html)
الصفحات:
1
2
من انا ؟ و من اكون ؟ هل انا صحيح ام كنت مخطئ ؟ - Pepo - 2008-02-13
كنت طفل كا أى طفل
نشأت بحى شعبى كله ناس طيبين
كان ليا اصحاب كتير وكنا دايما نلعب سوى كورة استغماية سبعاوية الخ
بس كنت مختلف شوية عن اصحابى.. هما كان كل هوايتهم وتفكيرهم فى الكورة.
انا كانت كل هوايتى اتفرج على الأفلام الخيال العلمى واتفرج على شكل الأجهزة العجيبة اللى عمرى ماشوفتها فى حياتى
وكنت دايما امسك اللعب بتاعتى بعد اما اخلص لعب بيها افتحها واشوفها بتشتغل ازاى.. واغلب الوقت كنت بخربها
بس كمان ساعات كنت باخد حجات منها واحولها لحجات تانية
مثلا افتكر وانا بين الخمس سنين والست سنين ( خمس سنين و اربع شهور تقريبا )
كان عندى عربية لعبة اللى هى الريموت بتاعها فيه سلك وبتطلع لقدام وترجع لورا.
بعد اما لعبت بيها شوية .. حسيت انها لعبة غبية جدا . ايه الفايدة انى افضل اطلعها لقدام واراجعها لورا؟ مش لاقى فيها اى متعة .. قررت اخربها اقصد اطور فيها يعنى ركزوا معايا
المهم فتحت العربية وماخلتش فيها حاجة مالعبتش فيها وماعرفتش اجمعها تانى .. بس لاقيت جواها موتور شكله عجبنى .. صعب عليا ارميه مع باقى حجات العربية بصراحة
روحت عامل شكل مروحة ورق (اللى كنا بنعملها ونخلى الهوا يلفها)
وحطيتها على الطرف اللى خارج من الموتور ووصلت بالبطارية.. ولاقيت المروحة بقيت تلف معايا
وبقيت اعكس السلوك بتاعت الموتور واخلى المروحة تلف اتجاه معاكس للهوا
طبعا ده انا ساعتها كنت طاير من الفرحة (وطظ فى العربية اللى بوظتها)
لأن انا كده وفرت على نفسى كتير بدل ماكنت بجرى فى الشارع عشان الهوا يخلى المروحة تلف انا خليتها تلف وانا قاعد مكانى وساعات كنت بقربها منى وبخليها تجيب هوا
وفى يوم وانا فى السنة الأولى الدراسية
سمعت عن حاجة اسمها Family Game
ساعتها ماكانش حد يعرف حاجة بالأسم ده فى مصر.. ده واحد صحبى (طفل زيى وقتها)
شافوا فى فيلم اجنبى وكان بيحكيلى عنه..
طبعا زى ماقولتلكم انا كنت غاوى افلام خيال علمى ولما صدقت سمعت عن لعبة زى كده..
فضلت اسبوعين مقاطع امى وابويا واخواتى فى البيت لحد اما ابويا (الله يرحمه)
اتصرف وخلة واحد صحبه بعتهولى من برة مصر
ساعتها كنت بنام واصحى عليه.. وواحدة واحدة نزل السيجا فى مصر..
بعد ماتعرف شوية جهاز السيجا وبقة قديم انتشر بعده الـ play station
بس انا كنت وقتها زهقت.. لأن بقيت شبه بعرف فى كل الألعاب والـ play station رغم الفرق بينه وبين السيجا كبير الا انه كان بالنسبالى نفس الشئ
هالاقى عليه العاب جديدة.. هاقفلها واخلصها وهارجع امل تانى! (طبعا كل ده كان لسة عندى 11 سنة)
فضلت مافيش ورايا غير دراستى لحد اما وصلت لـ 15 سنة تقريبا
كان وقتها الكمبيوتر اتعرف شوية فى مصر.. وكان تقريبا ماحدش بيجيبه غير رجال الأعمال
او ولاد الناس الهاى كلاس اوى
طبعا الكلام ده انا بموت فيه من صغرى.. طول عمرى باشوف فى الأفلام بيجيبوا الكومبيوتر
يتكلم معاهم.. او شوية عيال يدخلوا جوة الكمبيوتر او مجموعة من الناس تولع فى الدنيا كلها بالكمبيوتر فانا فاهم ان الكمبيوتر ده هو اللى انا بشوفه فى الخيال العلمى وغير كده كان بيتحكيلى من اللى اكبر منى لما اشوف حاجة شكلها مش طبيعى.. انها معمولة بالكمبيوتر. يعنى مثلا لما اشوف فى فيلم واحد رقبته طارت ولسة بيتكلم واسأل ابويا (الله يرحمه) يقولى ده شغل كمبيوتر
فابالنسبالى الكمبيوتر ده هو الحلم اللى انا عايزه هو ده اللى بدور عليه (كنت فاكر نفسى ماتركس)
اخدتلى اسبوعين تانيين مقاطع البيت كله ومش باكل حتى غير فى الخفى مع نفسى من غير ماحد يشوفنى عشان امثل عليهم دور اللى هايموت لو ماجالهوش الكمبيوتر.
لحد اما جيه الكمبيوتر.. وماتتخيلوش مدة الجهل اللى كنت فيه وقتها.. لما كنت بمسك الماوس كنت ببص عليه وانا بحركه بدل مابص على المؤشر بتاعه ال يعنى انا كده بشوف انا بوجهه ازاى!
واحدة واحدة قدرت ان اعرف العب عليه.. ولاقيت الموضوع عليه مختلف تماما
يعنى ايام السيجا لما كنت بخلص لعبة كنت بزهق عشان مافيش غيرها.
لكن الكمبيوتر لما كنت بخلص لعبة كنت بجيب غيرها فى نفس اليوم من اى حد من اصحابى
بس مع مرور الوقت الألعاب كلها شبه بعض.. طب فين الجديد؟ فين الحجات اللى كنت بشوفها فى الأفلام؟
وقتها وقعت الكارسة واللى دفع تمن الغلطة الشركة اللى كنت واخد منها الكمبيوتر..
كنت وصلت لمرحلة اللى هو خلاص لا العاب بعد اليوم واللى جاى كله فزلكة لحد اما اتعلم عشان اعرف اعمل زى الأفلام
الكمبيوتر فضل لمدة سنة يوم عندى فى البيت ببوظ فيه واليوم التانى فى الشركة بيتصلح (ببلاش طبعا فى الضمان) وكنت واخد الموضوع معاهم بلطجة.. يقولولى ده عيب يوزر.. اقولهم لا ده عيب الجهاز بتاعكم وتصلحوه. وبصراحة هو كان عيب يوزر من الدرجة الأولى
بس انا اعرف منين؟ انا كل اللى فاهمه انهم هما اللى اغبية ومش بيصلحوه صح لما بوديهولهم خلصت السنة بتاعت الضمان وخلص معاها الكمبيوتر بتاعى . يعنى الكمبيوتر بالظبط فضل معايا من 1-1-1999
لحد 1-1-2000 كان الماذر بورد طارت والرامات اتحرقت والهارد ديسك اللى هو 1.6 جيجا مابينطقش والسى دى روم خرب.. والفلوبى ولاد اختى جابوا اجله
وفضلت بعدها حوالى سنتين من غير كمبيوتر.. لحد اما فضلت امثل شوية لحد اما جالى الكمبيوتر اللى لسة معايا لحد النهاردة. بدأت اتعلم من الحجات اللى عملتها فى الجهاز القديم. وفى اول اسبوع نسخة الويندوز طارت
فى الأول قلت هاوديه للشركة. ولما ركزت مع نفسى شوية قلت لا.. ماهو الجهاز الأولانى كنت كل يوم بوديه للشركة وهما اللى بوظوه
قلت اشغل دماغى واحاول افهم ايه اللى بوظه.. من هنا لهنا لهنا قدرت ادخل على الدوس.. وطبعا مش فاهم اى حاجة فى اى حاجة فيه. بس حاولت واتصل بواحد صحبى بعتلى نسخة ويندوز وقالى اخليها تشتغل بوت ازاى
وعرفت انا اسلك فى الباقى. وبقيت كل 5 او ست ايام فى اول شهرين انزل نسخة ويندوز
وخلال اول 4 شهور ماباقاش فى حاجة اسمها كل كام يوم انزل ويندوز. عشان حبيت اقدر اركز فيه وفى امكانياته بدل مافضل اصلح فيه. من هنا لهنا حبيت اعرف ازاى اعمل برامج.. كنت معترض على موضوع الويندوز وعايز اعمل نظام تشغيل على مزاجى ( بلا ويندوز بلا شغل مايكروسوفت) روحت اخدت دورة C#
حوالى اربع شهور ورجعت منها بعرف اعمل الة حاسبة
ساعتها بقة ماقولكوش على حالة الأحباط! بقة هو ده كان حلمى؟ الة حاسبة؟ اومال لو فكرت اعمل كيبورد هادرسه فى مصر اد ايه؟ برغم انى كنت متفوق جدا فى الدورة دى على كل اللى معايا (كنت ساعات بحرج الأدمنستريتور بأسئلتى, وماكانش بيعرف يرد عليا). بس لا مش ده كان هدفى
المهم لاقيت انى عشان اكمل فى الموضوع واوصل لهدفى صعب جدا ان ده يحصل وانا فى مصر.
الا اذا كان ابويا حجز على بنك القاهرة وقالى خد فلوس من غير حساب.!
قررت ان اغير تفكيرى وابدأ مع نفسى واحدة واحدة.
وقتها جالى موبايل هدية من اخويا الكبير 6600 وعجبنى جدا انى اقدر احط فيه برامج والعاب
واستمريت فى موضوع الموبايل لحد اما قدرت افتكس فيه حجات كتير اوى.
اخرها كان ليا صحبى متجوز.. وليه صحباته بيتصلوا بيه ومراته كمان بتعرف فى الموبايل بتاعه كويس
يعنى لما بيمسح رقم صحباته من اخر المكالمات هى بتعرف تتطلعهم من سجل الهاتف.. ولو مسح السجل كله بتشك فيه وده طبيعى.. لأن السجل بيتحفظ فيه مكالمات لمدة 20 يوم على الأقل وساعتها صحبى ده اترجانى اكتر من 10 ايام انى اشوفله حل فى الموضوع ده (لأن اللى كان بيشوف تليفونى كان بيقول عليا عبقرينو عصره)
المهم كان فى وقتها برنامج مش فاكر اسمه.. شغلته ان يعمل بلوك لأرقام معينة بحيث لما الأرقام دى تتصل بيك يرد
بالرسالة اللى بتقول ان الهاتف غير متاح.. وكان فى برنامج تانى اسمه UnSis تقريبا
عدلت انا على البرنامج بتاع حجب المكالمات ببرنامج unsis مع كام برنامج اكواد وخليته بدل مايحجب المكالمات.
يحجب السجل عن المكالمات.. يعنى يخلى السجل مايشوفش المكالمات دى, وبالتالى مايسجلش عنها اى بيانات.
(ساعتها صاحبى حلف بالطلاق انه يحاسبنى على البرنامج وادانى 300 جنيه, برمجة خاصة بقة
)طبعا فضلت مستمر فى اللعب فى الموبايلات لحد اما لاقيت ان كل يوم بينزل موبايل جديد.. ولو عايز اكمل شغل فى الحجات دى يبقة لازم اجيب كل يوم موبايل.. كبرت دماغى من الفكرة دى
وبدأت ادخل بقة فى المنتديات واشوفها بتشتغل ازاى وبيتلعب فيها ازاى (بجانب الشات طبعا وخصوصا البالتوك)
وبعد اما خفيت من كريزمة البالتوك. بدأت استعيد نشاطى بس بشكل مختلف
وبدأت اركز فى مواضيع المواقع والمنتديات ولغة برمجة المواقع. على امل انى احقق حاجة من اللى دايما حلمت بيهم (طبعا بعيد عن الخيال العلمى) بس على الأقل اقدر اوصل لفكرة جديدة اسابق بيها نفسى واسابق كل اللى فى سنى
طبعا طولت عليكم صح؟ بس متهيألى ده قسم النقاش العام كل واحد بيقول اللى فى نفسه
Re: من انا ؟ و من اكون ؟ هل انا صحيح ام كنت مخطئ ؟ - طالب العلم - 2008-02-13
في الحقيقة افلام الخيال العلمي التي تحدثت عنها افادتك كثيرا....
طبعا من ناحية كتابتك للمواضيع لاحظت انك لك موهبة في الكتابة..
هناك ما يعرف في الكاتبة بفن التصوير(ليس التصوير اخذ الصور) وانما تصوير الوقائع..يعني...
الشخص لما يقرا موضوعك تتشكل في ذهنه تلك الواقائع في شكل صور وكانه يراها امامه
تحية تقدير مني على اسلوبك الرائع في الكتابة وتصوير الاحداث..
تستاهل 10/10
Re: من انا ؟ و من اكون ؟ هل انا صحيح ام كنت مخطئ ؟ - Pepo - 2008-02-13
من ناحية فايدة الأفلام الخيال العلمى. فعلا بالنسبالى انا كا شخصى انا. فعلا افادتنى
وانا مقتنع بنفسى وحاسس ان هانجح وهاوصل لهدفى فى يوم من الأيام وكتر الف خيره اخويا الكبير ابو طارق
هو اللى دايما بيشجعنى فى اوقات كتير اوى بكون محتاج اللى يشجعنى فيها.
بالنسبة لموضوع موهبتى فى الكتابة. بجد دى كنت اخر حاجة اتوقعها انى اكون كاتب كويس. لأنى دايما بواجه صعوبة فى التعبير عن قصدى. والكلام ده مش فى نظرى, لكن ده فى نظر كل اللى قرب منى. فعلا بواجه صعوبة فى توصيل المعلومة.
يبقة ازاى قدرت اكتب كويس؟ تقدر تقول الكلام اللى بصدق بيوصل بأى شكل من الأشكال. لكن صعب انك تقول انى كاتب كويس
Re: من انا ؟ و من اكون ؟ هل انا صحيح ام كنت مخطئ ؟ - طالب العلم - 2008-02-13
مهما حاولت تبرر انك لست كاتب جيد..الا اني ارى انك كاتب جيد...
Re: من انا ؟ و من اكون ؟ هل انا صحيح ام كنت مخطئ ؟ - عوض محمد - 2008-02-13
وانا معاك اخى طالب علم بانه كاتب جيد ويجيد الكتابة بشكل يختلف عن الاخرين
وعندى نقطة تانية مجرد انك تفكر تعدل على سيارة بريموت كونترول يبقا انت وصلت
مع العلم انك ممكن تتعلم من اخطاء الاخرين ولكن لابد لك من الخطا وتتعلم منو
وغالبا ما بنتعلم من اخطاء انفسنا وليس من اخطاء الاخرين بنسبة تقدر ب 70%
وهذا ما جعلك متميز
تقبل مرورى
Re: من انا ؟ و من اكون ؟ هل انا صحيح ام كنت مخطئ ؟ - Pepo - 2008-02-13
سبحان الله
والله ردودكم شبه متسببالى فى حالة دهشة كبيرة
بجد كانت اخر حاجة اتوقعها ان حد يقول انى كاتب كويس!
Re: من انا ؟ و من اكون ؟ هل انا صحيح ام كنت مخطئ ؟ - alfawalidou - 2008-02-13
بالفعل اخي بيبو من دون مجاملة أسلوبك في الكتابة
يروق للقارىء و لقد وفقت في تصوير احداث التي مريت عليها
كما ان قصتك روعة و اجد انني اشاركك في بعض المراحل مريت عنها في صغري
و انك صراحة انسان موهوب استطيع ان اقول ان لديك سرعة في التأقلم
مع اي مجال تهواه ما شاء الله
تمنياتي لك بالتوفيق و النجاح
Re: من انا ؟ و من اكون ؟ هل انا صحيح ام كنت مخطئ ؟ - Pepo - 2008-02-13
تسلملى يا طيب على تعليقاك الجميل
وتسلمولى جميعا على لفت نظرى لموضوع الكتابة
لأنى بجد كتبت الموضوع ده فى وقت كنت عاجز انى افيد المنتدى فيه بأى حاجة
يعنى كنت شبه قاعد زهقان وفاضى ومش لاقى حاجة مفيدة اعملها للمنتدى.
قلت اتكلم عن نفسى شوية. وماكنش المقصود ابدا الإبداع بالكتابة او اى شئ من هذا القبيل
بل بالعكس كنت حاسس انى مش هاشوف تعليقات واحتمال ناس كتير تمل من الموضوع وماتكملهوش لأخره.
إقتباس :استطيع ان اقول ان لديك سرعة في التأقلمهذا ما احسه فى قرارة نفسى.. الا ان كل من حولى ومن عاشرنى (بإستثناء ابو طارق)
مع اي مجال تهواه ما شاء الله
يقول انى هوائى .. وكل يومين طالع فى حاجة شكل!
RE: من انا ؟ و من اكون ؟ هل انا صحيح ام كنت مخطئ ؟ - أبو طارق - 2008-02-14
Pepo كتب :اخدتلى اسبوعين تانيين مقاطع البيت كله ومش باكل حتى غير فى الخفى مع نفسى من غير ماحد يشوفنى عشان امثل عليهم دور اللى هايموت لو ماجالهوش الكمبيوتر لحد اما جيه الكمبيوترالى انت تقريبا متعرفوش انى عندى تسجيل فيديو وانت طالع فيه وكنت ساعتها عامل فيها زعلان
يعنى الكمبيوتر بالظبط فضل معايا من 1-1-1999لحد 1-1-2000 كان الماذر بورد طارت والرامات اتحرقت والهارد ديسك اللى هو 1.6 جيجا مابينطقش والسى دى روم خرب.. والفلوبى ولاد اختى جابوا اجله
علشان الكمبيوتر
ثم يا سيدى مش ولاد اخواتك هم الى بووظو الجهاز ده طارق بس ايه يعنى
وانت صدقت فعلا فى ان الكلام لما يكون من القلب بيكون حجم الصدق أكبر
وانت كنت بتحكى عن نفسك بمنتهى الصراحة (تحسد عليها )
وياريت تكون فاضى كتير وتحكلنى عن طفولة عبقرى
Re: من انا ؟ و من اكون ؟ هل انا صحيح ام كنت مخطئ ؟ - Pepo - 2008-02-14
أبو طارق كتب :الى انت تقريبا متعرفوش انى عندى تسجيل فيديو وانت طالع فيه وكنت ساعتها عامل فيها زعلانطيب بلاش فضايح
علشان الكمبيوتر
أبو طارق كتب :ايوا فاكر البنس اللى طلعناها من الفلوبى ديسك؟
ثم يا سيدى مش ولاد اخواتك هم الى بووظو الجهاز ده طارق بس ايه يعنى
أبو طارق كتب :ماهو ده اللى بحاول اقوله وهما بيقولو لا انت بتكتب كويس .. كانوا على وشك يخلونى اصدق نفسى
وانت صدقت فعلا فى ان الكلام لما يكون من القلب بيكون حجم الصدق أكبر
وانت كنت بتحكى عن نفسك بمنتهى الصراحة (تحسد عليها )
وياريت تكون فاضى كتير وتحكلنى عن طفولة عبقرى