هل ترى ان الدكتور محمد البرادعى يصلح رئيسا لمصر

[نورمحمدغريب]

هل ترى ان الدكتور محمد البرادعى يصلح رئيسا لمصر
وما السبب من وجهة نظرك

[Pepo]

صراحة لجهلى بتاريخه (الا مابرز من تاريخه ويعرفه اى شخص عادى) لا استطيع ان اجزم فى رأيى فيه اذا كان يصلح ام لا.

لكن ما استطيع ان اجزم به, ان وضعه كارئيسا سيحسن من اوضاع مصر, ببساطة ستعود للشعب ثقته بقدرته على التغيير.

ومن بعدها ان لم يستطيعوا تغيير الدكتور البرادعى نفسه (ان اتضح انه لا يصلح) بالتأكيد سيغيروا من سلبياتهم الأخرى.

[wail2000]

يوجد قول مأثور يقول
[ التغير حتى إلى الأسوأ حسن أو جيد]
ليس مهم أسم أو شخصية من يتولى زمام ومقاليد الحكم في مصر من بين المعارضين لحكم مبارك

المهم يوجد التغير هو اول لبنة في بناء الاصلاح والتجديد التحتمي للمؤسسة الرئاسية في مصر

[lORDkAIBA]

نعم انتخبه
لانه علي سياسي عالي جداً وزير الوكاله الدولية للطاقة الذرية وحاصل علي جائزة نوبل للسلام
وهو علي اي حال افضل من حسني مبارك وان كان لم يعلن يعد عن خططه فبالتأكيد هو ينتظر اولاً تغيير القانون76
الخاص بالانتخاب لمن يوافق عليه الحزب الوطني
وللعلم ان ايمن نور اعلن انه ان تم تغير القنون76 من الدستور مش هيدخل النتخابات لكي يطرح الفرصة للدكتور محمد البرادعي
وان كان لم يقدم شيئاً لمصر عندما كان في الوكالة الذرية فهذا لأنه لم يكن يقدر بسبب قاناون الوكالة الدولية الذي يصر علي عدم تدخله بشئون الدولة داخل مصر وكمان قدم لمصر فهو ساب الوكاله عشان خاطر مصر وعشان حالتها المؤسفه اللي هي عليه النهارده
وبعدين اللي يطمن اكثر انه رجل غني ومش محتاج فلوس مثلا عشان يستغل منصب الرئيس وخصوصاً ان حالة مصر مش حلوه ابدا عشان يستغلها هو كل امله انه يفيدنا وبس وخصوصاً انه قال لو اتلغي قانون 76 من الدستور ان مستعد ايب الانتخابات لو الشعب عايز كده
واللي يأكد انه عنده خطه هو انه كان بره لمده طيوله وشاف الديمقراطية وعنده فكر عن الطريق الصح

[أبو طارق]

هل ترى ان الدكتور محمد البرادعى يصلح رئيسا لمصر
وما السبب من وجهة نظرك

أولا أحيك على طرحك هذا لكثرة الجدل حول شخص البرادعى
أن كان يصلح أو لا يصلح فهذا فى علم الغيب .... لماذا
أولا إن كان سوف يرشح نفسه فبالتأكيد سوف يعرض برنامج كله
طموحات وأمال وأحلام تسعد خيال الحالمين ؟
ثانيا أرى أن كل ما يهم البعض هو التغير والتغير فقط دون تقدير حقيقى
للشخص المغير بمعنى أن الناس ملت من حكم مبارك والأهم هو ظهور
الفساد المنتشر فى مصر من خلال برامج (التوك شو) التى تنافس بعضها
بعض لمن السبق فى الإعلان عن الفساد فى أى وزارة أو هيئة وطبعا
الشخصيات العامة من وزراء ونواب مجلس شعب ؟
وهذ هو مربط الفرس فى الأمر من خلال تقديرى المتواضع
ليس دفاع عن حكم مبارك ولكن أرى أن العيب فى النظام كل النظام
فحتى لو أتى البردعى وحكم فهو ليس عمر بن عبد العزيز رضى الله عنه
حتى يغير الناس أو يجبرهم على تحمل المسؤلية
إننا نعانى من فساد فى الأخلاق قبل أن نعانى من قلة الحيلة فى كسب لقمة العيش
أخلاق مسؤليين كبار وصغيرين فى الوزارة والحى والمجلس ونواب المجلس
موظفين مرتشن بحجة قلة المراتب وأغنياء عايشن فى مصر غير الى احنا عايشن فيها
ده جزء بسييييييييييط من الصورة فلو البرادعى عند الحل فهنئ للمصريين ببرداعهم ؟

[Pepo]

ماهو فساد المسؤليين فى الحى (كامثال) بسبب فساد المحافظ, وفساد المحافظ بسبب فساد من فوقه, الى الوزراء الأكثر فسادًا بسبب فساد الرئيس, يعنى لو كل مسؤل يراعى ضميره (ابتداءًا من السلطة العلية وهى الرئاسة) فى ادارة ماهو مسؤول عنه كان المسألة اختلفت.

كامثال بسيط, لما يكون رئيس هيئة الضرائب يتحصل على مرتب مليون جنيه شهريا, ده اكيد فساد فيه وفى وزير المالية (وزير المالية البلطجى على الشعب) ووجود وزير المالية ده اكيد بسبب اى مصلحة بينه وبين الرئيس.

لما مصنع زى مصنع طنطا للكتان يتباع بـ 83 مليون جنيه لرجل اعمال سعودى فى حين ان تقدير ارض المصنع فقط يساوى حوالى 10 مليار جنيه تبقة نصيبة.

لما واحد زى يحي الكومى فى قاعدة مع وزير الأسكان يتحصل على 5 قطع اراضى (له وللمدام وبناته الثلاثة) بأقل من 1/4 تمنه (اكيد فى ربع تانى عمولة لوزير الإسكان) يبقة وزير الأسكان فاسد, واللى عينه فاسد اكتر منه (الرئيس!)
(وهناك 11 قطعة ارض اخرى فى نفس القاعدة "العقود كانت كلها فى يوم واحد" لرجل اعمال اخر لا اتذكر اسمه حاليا, وكلهم موقعين من مكتب وزير الإسكان, وهو نفسه الوزير الذى انكر "فى احد برامج التوك شو على الهواء" ان هناك اى عقود تمضى بواسطته او بواسطة مكتبه, انما الموافقة تكون عن طريق الجهاز المختص فى عملية توزيع الأراضى والعقارات)
يعنى ببساطة لو بصينا على المال المسروق, والمال المهدور (زى المستشفيات اللى بتتبنى وتتكلف ملايين وبعدها تتهد عشان طلعت بدون ترخيص)

هانلاقى ان الفلوس دى لو تم ادارتها بشكل 1/2 سليم (مع ان من حقنا نحلم ان الأدارة تكون على الأقل 90 سليمة) الشعب المصرى هايعيش فى نعيم...

ده السبب اننا بنتعلق فى قشاية (سواء القشاية دى هى البرادعى او غيره)

[أبو طارق]

على نفس القياس الى انت حكمت بيه خليك معايا
لو لسمح الله واحد رزل أمين شرطة ولا مخبر مباحث أتراذل عليك
وخدك القسم بعد التحية الميرى ولبسك محضر وأنت تعرف واحد لواء
مش الموضوع هيخلص وممكن كمان يجى الرزل يتأسفلك تمام
ولما تروح تتطلع رخصة قيادة والباشا يعرف واحد لواء مش الرخصة
هتخلص قبل ما الباشا يخلص قهوته
ولما واحد ينصب عليك مثلا فى ثمن شقة وحضرتك تعرف واحد لواء
بالتأكيد مش اقل من نقيب هو الى هيكتب المحضر
ولما بابا أبنه كبر ونفسه يشوفه بالدبورة على كتفه ويعرف واحد لواء مش
الواد هينجح فى كل الكشوف بتاعت كلية الشرطة
ده كله فى وزارة واحدة هى وزارة الداخلية !
ياترى الوزير عنده خبر بكل الى بيحصل ؟
آه طبعا هو مش كان رتبة أقل فى يوم من الآيام وعارف الى بيحصل
بس تفتكر ازى تكون طريقة متابعتة لكل أقسام الوزارة ؟
فى يوم من الآيام كان وزير داخلية أسمه أحمد رشدى
هذا الرجل قضى على تجارة المخدرات فى الباطنية عاصمة هذه التجارة فى مصر
وأنزل كبار الوزارة إلى الشوارع كان مشهد صار عادى على المصريين أن يروى
لواء ينظم حركة المرور وكان ما كان من حواديت المصريين عنه ؟
كان يقال أنه ينزل متخفى فى أى زى عادى ويراقب عمل رجاله
وهذا كان تحت حكم مبارك
لكن هذا الرجل لم يكون على هوى كبار الوزارة فكان أن أشاعوا أنه(زود سنه على المجندين)
فخرج المجندين من سكناتهم فى معسكر الدراسة وأخر قرب مدينة 6 أكتوبر
طبعا بتنظيم من كبار الوزارة وتخطيط منهم فكان من مبارك أن أمر أبو غزالة وزير الدفاع بنزول
رجال القوات المسلحة إلى القاهرة وتم تهدئة الأمور (وأتشال فيها عمنا أحمد رشدى)
عاز أقولك أن بلادنا لسه بدرى عليها فى حجم الديمقراطية المطلوبة
وحجم المصالح فى بلدنا كبييييييييييييييييييييير جدا
أنا مش بدافع عن مبارك أنا عايز أوضح ليكم الرؤية متبقوش حالميين أوى كده
وبالروح والدم نفديك يا برادعى
لما أنت تبطل تعمل الحاجات الى أنا ذكرتها أبقى حاسب الى بيتوسط والى بيرتشى
المشكلة فينا ؟ هو لازم حد يسقنا علشان نتحرك شششششششششششششششى

[Pepo]

المشكلة انك رجعت واقريت ان المشكلة كانت فى كبار الوزارة فى عزل راجل عنده ضمير زى اللى انت ذكرته.

يعنى برضه من فوق, مش الوزراء دول اللى بيحطهم المعلم ابو جمال ولا انا معلوماتى مش صح؟

يعنى لما جيه المسؤل ياخد باله من رجلته (المرتشيين والفاسدين الصغيرين) الكبار ماعجبهمش وطيروه, يبقة المشكلة فى الكبار اللى هما اصلا حاططهم كبير واحد (ابو جمال)


مش عايزين كل الديموقراطية, مش عايزين نزيل 100% من الفساد, بس على الأقل نعيش عيشة محترمة وتصلح للبنى ادميين, مش عيشة الـ شىىىىىىى

[أبو طارق]

المشكلة انك رجعت واقريت ان المشكلة كانت فى كبار الوزارة فى عزل راجل عنده
ضمير زى اللى انت ذكرته يعنى برضه من فوق, مش الوزراء دول اللى بيحطهم
المعلم ابو جمال ولا انا معلوماتى مش صح ؟

تقريبا أنت لم تصل لما أريد أن أقوله
وزير عينه أبو جمال معجبش معلمين الوزارة
وأتمرو عليه ونطروه طب أبو جمال جبلك أبو ضمير وبعدين ؟
----------------------------------------
يا مولنا يقعد برادعى يمشى مبارك
مش دى مشكلة مصر ؟
تقدر تقولى نواب مجلس الشعب الى خدت فلوس البلد بحجة العلاج على نفقة الدولة أيه
دور الحاكم فى موضوع زى ده غير أنه بعد المصيبة ما تحصل يأمر بفتح تحقيق ؟
تقدر تقولى الناس الى خدت قروض من البنوك وهربت بره مصر أيه دور
الحاكم فى موضوع زى ده غير أنه بعد المصيبة ما تحصل يأمر بفتح تحقيق ؟
تقدر تقولى الناس الى بيوتها انهارت من السيول الأخيرة فى العريش والصعيد
أيه درو الحاكم فى موضوع زى ده والمحليات هى من اصدرت تصاريح بناء
فى طريق مخرات السيول ؟ ..... وقياسا على كده كتير
إصلح مصر عمره مايكون فى تغير الحاكم ولكن أحنا الى لازم نتغير كلنا
تعرف حاجة أسمها ( بطانة السوء )
مشكلة البلد فى البطانة لأنها لو بطانة كويسة البدلة هتعيش كتير لكن لما تبقى
بطانة دايبة يبقى على البدلة السلام قصدى على البلد السلام
ولو سمحت مترجعش تقولى أصل الترزى أسمه أبو جمال
لأن الفساد موجود فى أم الديموقراطية فى العالم ولو عايز امثلة أجبلك

[Pepo]

تقريبا أنت لم تصل لما أريد أن أقوله
وزير عينه أبو جمال معجبش معلمين الوزارة
وأتمرو عليه ونطروه طب أبو جمال جبلك أبو ضمير وبعدين ؟

ماهو ده مصير طبيعى لما تحط شيخ وسط عصابة!

ثم ان فى حاجة متهيألى انت مش ملاحظها, انا مش معترض ابدا على ان 90% من المسؤلين سواء وزراء او غيرهم اتنسى ومات الضمير جواهم...

ودول أُس بلاوى فى البلد, بس فى نفس الوقت دور الرقابة على اللى زيهم فيه خلل, وبداية الخلل من فوق, يعنى مبارك سواء بسبب فساده هو شخصيا او لا, هو ماينفعش يكمل, لحد كده كفاية عليه البلد على قد ماعمرت على قد ماخربت (والخراب بيضر اكتر مالعمار بيفيد)...

انما احنا نتغير دى, فادى زى مانت قولت مالهاش علاقة بالحاكم الا فيما يرعاه (يعنى كل ماتحت نظره وسلطته, ماهو كمان الحاكم مش هايدخل البيوت يصلح اللى فيها) لكن على الأقل المفروض يصلح اللى فى الوزارة...


طول مالرئاسة خربانة, الوزارة خربانة, واللى تحتها خربان, وطول ماكل دول خربانين الناس هاتفضل تخبط شمال ويمين, وتلاقى فساد فى مجلس شعب, وشورة او حتى فى اى مجلس على القهوة, الفساد انتشر بسبب قلة الرقابة وقسوة الظروف اللى المصريين فيها.

احنا شعب تقريبا مش طماع يابو طارق, انت مثلا, طول ماحياتك مستقرة وبيتك مستقر انت راضى (وانا مثلك وامثالنا كثير) مش هاتطمع يكون عندك فيلا ولا قصر ولا عربية هامر (مع ان من حق اى حد انه يحلم بالزيادة, بس نشوف ده لما يكون عندنا مقومات الحياة الأساسية متوفرة)

مش طالبين اكتر من استقرار معيشى, لما مانقدرش نحصل عليه, والأسوء ان يكون 60% من الشعب فى مستوى لا يصلح للعيشة الأدامية (بقة بلدى المسمى بتاع تحت خط الفقر, اللى يعيش والزبالة حواليه والمجارى من كل ناحية يبقة مش عايش عيشة بشر)

يبقة حلمنا فى تغيير اللى يحكمنا اقل حقوقنا يمكن اللى يجى يعمل حاجة, لأنه ببساطة لو ماعملش فى ناس كتير اوى (حتى لو انا وانت مش منهم)
مش هيتضروا ولا هايوصلوا لأسوء من اللى هما فيه.