واحد صفر

[أبو طارق]

واحد صفر
بقلم : بهاء جاهين
______________________________________________
‏
واقف قصاد دكانة وسط الزحمة

للجزارين يرموا له حتة لحمة

بفلوسه‏,‏ من تعبه وشقاه‏,‏ بس آه

كيلو لحمة‏:‏ يعني يجوع وعيلته معاه

أسبوع‏,‏ مايلقي حتي عيش الرحمة
‏
______________________________________________

كيلو لحمة‏:‏ مصروف الولد في النادي

يزيد عليه‏,‏ والواد يقول‏:‏ ياسي دادي

إشمعني جو مصروفة في اليوم مية؟

كيلو لحمة مايكملش حتي عيدية

لولد عبيط ساقط في تالتة إعدادي
‏
______________________________________________

كيلو لحمة‏:‏ ربع ماهيتك بالميت

يا اسطي علي‏,‏ يامصطفي وياسيد

إن كان علي حسين أو حسن أو زينهم

يشموا ريحة العيد كفاية عشانهم

كيلو لحمة بس‏,‏ عشان ندوق ونعيد
‏
______________________________________________

آدي الدبايح والكهارب صحبة

متعلقين مابين مغني وصهبة

وهو واقف قزم‏,‏ واحد صفر

وعينه في العالي وحالته كفر

وإيدين جياع متعلقين في الرقبة
‏
______________________________________________

وراح وقف علي أعلي نقطة وقال‏:‏

أنا رايح اغور من وشكم في الحال

إذا كان أنا وعيالي مالناش عيد

وإيدي عاجزة تخلي إبني سعيد

إيه لزمتي والدنيا علي دا الحال؟
‏
______________________________________________

زملاته طبعا أنقذوه‏,‏ تلاقيهم

جابوا له طلبه من عيون أهاليهم

وهو لازم يعني واحد يكفر

علشان ينول طلب بسيط وصغير

وولاده يحلموا بالفتات ويجيهم؟
‏
______________________________________________

وماتش كورة وبلطجة واجوان

فيه حاجات كتيرة أهم ياجدعان

منظر جميل علم بلدنا يرفرف

في إيدين ولادنا‏,‏ بس لازم نعرف

إن الخروف مدبوح فداه إنسان